Një zjarr i përmasave të mëdha që shpërtheu të enjten rreth 100 kilometra në veri të Madridit vijon të përhapet me intensitet të lartë, duke shkaktuar dëme masive në zonat pyjore të Spanjës qendrore.
Sipas autoriteteve të zjarrfikjes dhe parandalimit të zjarreve (Infocam), zjarri ka përfshirë tashmë rreth 260 mijë hektarë tokë, ndërsa rreth 1,200 persona janë detyruar të evakuohen nga banesat e tyre për shkak të rrezikut.
Flakët nisën në fshatin Mierla, në rajonin e Guadalajara-s, pjesë e komunitetit autonom Castilla-La Mancha, dhe gjatë orëve të fundit janë përhapur kryesisht në zonën e Parkut Kombëtar Sierra Norte, duke vënë në alarm autoritetet lokale.
Ekipet e emergjencës vijojnë betejën me zjarrin, por kushtet e vështira atmosferike, temperaturat e larta dhe erërat e forta po e bëjnë më të vështirë kontrollimin e vatrave aktive.
Shqetësimi është rritur edhe për shkak të afrimit të një vale të re të nxehti në Spanjë, e cila sipas ekspertëve mund të përkeqësojë situatën dhe të rrisë ndjeshëm rrezikun për zjarre të reja katastrofike.
Autoritetet u kanë bërë thirrje banorëve të zonave të prekura të ndjekin udhëzimet e emergjencës, ndërsa operacionet për shuarjen e flakëve vijojnë pa ndërprerje.
