Kryeministri i vendit, Albin Kurti, është shprehur optimist për tri javët e mbetura deri tek zgjedhja e presidentit.
Ai pas takimit me kreun e LDK-së, Lumir Abdixhiku, tha se patën takim dashamirës dhe konstruktiv.
Sipas tij zgjedhjet duhet shmangur dhe është sfidë që një parti e vetme t’i arrijë 80 deputetë në zgjedhje.
“Me Abdixhikun ishin në takim afër 2 orë me këtë rast diskutuam për situatën e re politike, pas aktgjykimit të Gjykatës Kushtetuese…Çështja kryesore që u diskutua ishte fakti që na kanë ngelur edhe tri javë deri tek zgjedhja e presidentit dhe për këtë duhet t’i maksimalizojmë përpjekjet. Takimi shkoi në një atmosferë konstruktive dhe dashamirëse. Jemi të përcaktuar t’i shmangim zgjedhjet e reja sepse nuk do të ishin zgjidhje për numrin prej 80 deputetësh. Është vështirë ta paramendojmë një fushatë zgjedhore me po të njëjtat zotime, për një rezultat që e dijmë që nuk mund të jetë shumë ndryshe. Numrin prej 61 deputetëve për formimin e qeverisë nuk e kemi sfidë, por është sfidë tejet gjigante që një parti t’i ketë 80 deputetë dhe ta zgjedhë vetë presidentin”, tha Kurti para mediave.
“Ju e dini shumë mirë që jemi përpjekur edhe më herët dhe kandidati ynë, Glauk Konjufca, është zyrtarizuar më pak se 30 orë para mesnatës ndërmjet 5 dhe 6 marsit. Ndërkaq, kundërkandidatja e tij, doktoresha Fatmire Mulhaxha-Kollçaku, është zyrtarizuar më pak se tri orë para mesnatës ndërmjet 5 dhe 6 marsit. Pra, ne kemi bërë përzgjedhje të detyruar për brenda subjektit tonë, ndërkohë kur nuk nxirrte askush asnjë propozim për kandidat. Dhe ndodhemi tani ku ndodhemi. Unë vazhdoj të jem optimist se me takime dhe bisedime të këtilla do të mund të arrijmë një marrëveshje politike, por këtë nuk mund ta them që e kemi sot. Veçse, atmosfera konstruktive në njërën anë dhe dashamirësia që t’i shmangim zgjedhjet e reja që nuk janë zgjidhje e re në anën tjetër, më bën optimist për këto tre javët e mbetura që uroj të mos i shfrytëzojmë deri në ditën apo nganjëherë siç po bëhet në institucionet tona, orën e fundit”, tha kryeministri i Kosovës.
