Rasti i parë i Etheve të Nilit është konfirmuar në Shqipëri. Bëhet fjalë për një 72-vjeçar nga Korça, i cili ndodhet nën kujdesin mjekësor në Spitalin Rajonal të Korçës.
Sipas burimeve, i moshuari jeton në qytetin e Korçës dhe dyshohet se është pickuar nga një mushkonjë gjatë qëndrimit të shpeshtë në një lulishte të qytetit.
Pas paraqitjes në spital dhe kryerjes së analizave, rezultati ka konfirmuar infektimin me virusin e Nilit Perëndimor. Personat e afërt me 72-vjeçarin janë testuar gjithashtu, por analizat e tyre kanë rezultuar negative.
Për shkak të rastit të konfirmuar, pritet që në zonë të ndërhyhet me dezinfektim. Ndërkohë, një grup specialistësh dhe epidemiologësh po kryen verifikime në qarkun e Korçës për të evidentuar praninë e mushkonjave që mund të transmetojnë virusin.
Ethet e Nilit Perëndimor transmetohen te njerëzit përmes pickimit të mushkonjave të infektuara. Në shumicën e rasteve simptomat mund të jenë të lehta, ndërsa në raste të rralla infeksioni mund të shkaktojë komplikacione të rënda neurologjike.
Autoritetet shëndetësore vijojnë hetimet për të përcaktuar nëse bëhet fjalë për një rast të izoluar apo nëse ekzistojnë raste të tjera të mundshme në zonë.
