Një udhëtim i zakonshëm me Stand Up Paddle në Liqenin e Shkodrës është kthyer në një moment të veçantë për një grup turistësh.
Gjatë guidës, turistët u përballën me një surprizë të pazakontë: një tufë delesh zbriti drejt bregut dhe hyri në ujërat e liqenit për t’u freskuar.
Përballë kësaj skene të papritur, turistët ndaluan lundrimin dhe i lanë hapësirë tufës të kalonte. Momentet janë filmuar gjatë guidës dhe janë publikuar në rrjetet sociale nga Kastriot Faci, guidë turistike dhe promovues i natyrës së Shkodrës.
“Një surprizë e bukur gjatë guidës sonë me Stand Up Paddle!”, shkruan Faci, duke e përshkruar takimin me tufën si një përballje krejt të paplanifikuar me natyrën.
Pamjet sjellin një tjetër moment karakteristik nga brigjet e Liqenit të Shkodrës, ku aktivitetet turistike ndërthuren shpesh me jetën dhe peizazhin rural të zonës.
Për turistët, ndalesa e papritur duket se e bëri edhe më të veçantë eksperiencën e lundrimit në liqen.
Burimi: Veriu Sot
