Në një kohë kur zjarret vijojnë të përhapen në zona të ndryshme të Pukës, Kisha Katolike ka reaguar me një apel për ndërgjegjësim dhe përgjegjshmëri ndaj natyrës dhe jetës së banorëve.
Mesazhi është përcjellë nga Atë Mario Tarantino, Administrator i Dioqezës së Sapës, i cili ka shprehur solidaritetin me banorët që po përballen me situatën e rëndë dhe ka bërë thirrje për kujdes maksimal.
“Pakujdesia jonë po përpin male, fusha e shtëpi”, është apeli i fortë i Kishës, duke vënë theksin te pasojat që mund të shkaktohen nga neglizhenca njerëzore.
Flakët kanë përfshirë sipërfaqe të konsiderueshme me pyje në territorin e Pukës, ndërsa në disa zona është krijuar rrezik edhe për banesat. Forcat e angazhuara në terren vijojnë betejën me zjarret për të izoluar dhe shuar vatrat aktive.
Përmes këtij reagimi, Kisha Katolike u bën thirrje qytetarëve të tregojnë më shumë kujdes dhe të shmangin çdo veprim që mund të shkaktojë zjarre, duke theksuar se mbrojtja e natyrës është një përgjegjësi e përbashkët.
