Kuvendi i Shqipërisë ka parashikuar rreth 265 milionë lekë, ose afërsisht 2.9 milionë euro, për një sërë prokurimesh deri në fund të vitit.
Mes zërave që tërheqin më shumë vëmendje janë karriget për sallën e seancave plenare dhe poltronet. Për këtë kategori janë planifikuar rreth 200 mijë euro, ndërsa kostoja e një karrigeje llogaritet mesatarisht nga 1,000 deri në 1,300 euro.
Një tjetër projekt me vlerë të konsiderueshme është “MediaHub”, një platformë e integruar komunikimi ku parashikohet edhe përdorimi i inteligjencës artificiale. Për projektin janë parashikuar rreth 400 mijë euro dhe ai shihet si një hap drejt krijimit të një televizioni të Kuvendit.
Megjithatë, ende nuk është përcaktuar projekti teknik dhe mënyra e funksionimit të platformës. Vetëm hartimi i këtij projekti është parashikuar të kushtojë rreth 6,500 euro. Një procedurë e mëparshme për gjetjen e subjektit që do ta hartonte dështoi pasi nuk u paraqit asnjë ofertë.
Lista e shpenzimeve përfshin edhe rreth 400 mijë euro për bileta avioni dhe udhëtime ndërkombëtare, 250 mijë euro për karburant dhe një tjetër fond prej 250 mijë eurosh për forcimin e sigurisë kibernetike.
Në plan janë përfshirë gjithashtu fonde për mirëmbajtjen e godinave, materiale higjieno-sanitare, fotokopjet, si dhe sistemet e ngrohjes dhe ftohjes së sallës plenare dhe godinës së Kryesisë.
Në total, fatura e parashikuar për prokurimet shkon në rreth 2.9 milionë euro, duke përfshirë mobilimin, teknologjinë, komunikimin, udhëtimet, karburantin dhe sigurinë kibernetike.
