Arben Kola, një nga liderët e protestës qytetare, ka bërë disa akuza serioze duke dëshmuar për ekzistencën e grupeve të infiltruar, të cilët, sipas tij, po përpiqen të dëmtojnë lëvizjen dhe t’i japin një dimension fetar apo kombëtar.
Ai paralajmëroi se këta individë do të identifikohen së shpejti dhe kërkoi nga organet e sigurisë që të veprojnë përpara se situata të dalë jashtë kontrolli dhe të arrijë në duar të protestuesve.
“Mes nesh janë grupe të infiltruar që heqin maskën dhe bashkohen me ne. Në ditët në vijim, do t’i zbulojmë me emra e fytyra. Njihet prania e grupeve greke që veprojnë këtu kundër Shqipërisë, si dhe e grupeve serbe. Po ashtu, kemi informacion për linjat fetare nga Turqia që tentojnë të imponojnë një narrativë fetare në protestë. Kjo lëvizje nuk do të zhbëhet. Ky është vullneti i shqiptarëve,” tha Kola.
Ai u distancua në mënyrë të qartë nga incidenti i ndodhur një ditë më parë me flamurin e Izraelit, duke theksuar se lëvizja qytetare nuk ka si qëllim një veprim agresiv ndaj shteteve të tjera ose simboleve të tyre kombëtare.
“Nuk jemi kundër asnjë shteti, as për të ofenduar flamujt e Izraelit, Serbisë, Greqisë, Iranit, etj. Ne natyrisht distancohemi nga çdo incident dhe do të lëshojmë një deklaratë,” përfundoi ai.
