Humbjet e energjisë elektrike në rrjetin e shpërndarjes kanë vazhduar të ulen edhe në vitin 2026. Gjatë tetë muajve të parë të këtij viti, humbjet totale kanë rënë në nivelin 15.6%, nga 16.96% që ishin regjistruar në fund të vitit 2025. Megjithatë, dallimet mes rajoneve vijojnë të jenë të konsiderueshme.
Të dhënat e Operatorit të Sistemit të Shpërndarjes tregojnë se Kukësi është zona me përqindjen më të lartë të humbjeve, duke reflektuar se krahas humbjeve teknike të shkaktuara nga amortizimi i rrjetit, niveli i vjedhjeve përmes matësave mbetet i lartë.
Në këtë rajon, humbjet arrijnë në 34.9% të energjisë së futur në rrjet. Pas Kukësit është Shkodra, me një normë humbjesh prej 29.06%. Ndërkohë, në tre prej qarqeve të tjera, humbjet kanë rënë nën pragun e 10%.
Referuar të gjithë drejtorive rajonale, humbjet kanë zbritur në 14.5%, nga 15.9% gjatë vitit të kaluar. Duke përfshirë humbjet në tension të lartë dhe faktorë të tjerë të bilancit energjetik, totali i humbjeve në rrjetin e OSSH-së arriti në 15.6%.
Në krahasim me vitin 2023, kur humbjet ishin në nivelin 18.93%, ky tregues shënon një përmirësim prej rreth 3.3 pikë përqindje.
Operatori i Sistemit të Shpërndarjes projekton që në fund të vitit 2026, humbjet në rrjetin e shpërndarjes do të jenë rreth 15.9%.
