Koloseu në Romë do të mbetet i mbyllur për të tretën ditë radhazi të premten, pas humbjes së jetës së një punëtori mirëmbajtjeje brenda amfiteatrit 2,000-vjeçar.
Monumenti u mbyll për publikun që nga e mërkura, pas aksidentit tragjik që i mori jetën Andrea Moretti, një teknik 22-vjeçar. Ai ra nga disa metra lartësi ndërsa ishte duke punuar për vendosjen e një sistemi të ri ndriçimi gjatë natës.
Sipas një zëdhënësi të ministrisë së kulturës, masa e mbylljes, e cila fillimisht kishte zgjatur deri të enjten, është shtyrë edhe për të premten, duke bërë që monumenti të rihapet të shtunën.
Zëdhënësi theksoi se është e nevojshme më shumë kohë për të vijuar hetimet dhe për të zhvilluar bisedime me personelin. Ministri i Kulturës, Alessandro Giuli, ka urdhëruar gjithashtu ndalimin e të gjitha veprave të ndërtimit dhe mirëmbajtjes në Koloseu deri në një njoftim të dytë.
I njohur si amfiteatri më i madh i Perandorisë Romake, Koloseu ka shërbyer në të kaluarën për luftime gladiatorësh, egzekutime publike dhe gjueti kafshësh. Sipas të dhënave të fundit nga ministria, në vitin 2024 monumenti ka mirëpritur afërsisht 15 milionë vizitorë.
