Shërbimet hekurudhore midis Roterdamit dhe destinacioneve në jug të Holandës janë pezulluar të hënën si pasojë e mbinxehjes në një kanal kabllor, e cila shkaktoi probleme në sistemin e sinjalizimit dhe ndërrimit të shinave, njoftoi ProRail, menaxhuesi i infrastrukturës hekurudhore.
Ky incident ndodhi afër stacionit Rotterdam Stadion, ku kabllot filluan të nxirrnin tym, duke bllokuar trafik hekurudhorin në linjat që lidhin Roterdamin me qytete si Dordrehti dhe Breda, sipas raportimeve nga transmetuesi NOS.
Operatori hekurudhor holandez NS njoftoi se janë vendosur një numër të kufizuar autobusësh zëvendësues mes Roterdamit dhe Dordrehtit, si dhe midis Roterdamit dhe Zwijndrechtit. ProRail sqaroi se riparimet do të vazhdojnë edhe pas përfundimit të orarit të së hënës, ndërsa ekipet janë angazhuar në zëvendësimin e 299 kabllove të dëmtuara në kanalin e prekur.
Ndërprerja e shërbimeve pritet të vazhdojë deri të martën në mëngjes, duke ndikuar si shërbimet e brendshme ashtu edhe lidhjen Eurostar me Brukselin.
Pesë trena mbetën të ndaluar për shkak të defektit, por patën mundësinë të rinisnin udhëtimin me fuqinë e tyre, pasi furnizimi elektrik në linjat ajrore ka mbetur i paprekur. Shkaku i mbinxehjes ende nuk është sqaruar.
ProRail njoftoi se po kryhet një hetim në bashkëpunim me një kontraktor. Holanda është ndër vendet më të prekura nga vala e të nxehtit në Evropë, ku temperaturat arritën deri në 38 gradë Celsius javën e kaluar.
