GJKKO shpall fajtor ish-shefin e Policisë Ardit Hasanbegaj, dënohet me 5 vite burg
Gjykata e Posaçme Kundër Korrupsionit dhe Krimit të Organizuar ka dhënë vendimin për ish-shefin e Policisë, Ardit Hasanbegaj, duke e shpallur fajtor për përfshirje në një grup të strukturuar kriminal dhe për sigurimin e kushteve e mjeteve materiale për kryerjen e vrasjeve të Dorjan Dulit dhe Ibrahim Licit.
Trupa gjykuese caktoi ndaj tij një dënim prej 7 vitesh e 6 muajsh burg. Megjithatë, për shkak të përfitimit nga gjykimi i shkurtuar, dënimi përfundimtar u reduktua në 5 vite heqje lirie.
Përveç dënimit me burg, gjykata vendosi edhe heqjen e së drejtës për të ushtruar funksione publike për një periudhë të përcaktuar nga ligji.
Sipas vendimit të GJKKO-së, Hasanbegaj rezultoi fajtor për rolin e tij në krijimin e kushteve dhe sigurimin e mjeteve që, sipas akuzës, i shërbyen realizimit të vrasjeve të Dorjan Dulit dhe Ibrahim Licit, në kuadër të veprimtarisë së një grupi të strukturuar kriminal.
