Saimir Rosales Rodriguez, shtetas kolumbian i njohur me pseudonimin “Kimisti”, ka mbërritur në Shqipëri, i ekstraduar nga Kolumbia, për të kryer një dënim prej 14 vjetësh burg. Ky dënim i është caktuar pas hetimeve të zhvilluara nga Prokuroria e Posaçme (SPAK) që zbuluan laboratorin e kokainës në Frakull.
Rodriguez është identifikuar si një nga personat kryesorë brenda grupit kriminal përgjegjës për administrimin e laboratorit të drogës, laborator që u gjet gjatë një prej operacioneve më të mëdha kundër narkotikëve në Shqipëri.
Zyrtarët njoftuan se, pasi u shkatërrua laboratori, Rodriguez kishte braktisur Shqipërinë për të shmangur ndjekjen penale. Ai më pas u gjet dhe u arrestua në Kolumbi, çka i hapi rrugën procesit të ekstradimit drejt vendit tonë.
Pas mbërritjes në Shqipëri, kolumbiani do të vuajë dënimin me 14 vite heqje lirie. Ndërkohë, çështja e laboratorit të kokainës në Frakull konsiderohet ende ndër rastet më të rëndësishme të hetuara nga SPAK në përpjekjet për të luftuar krimin e organizuar dhe trafikun ndërkombëtar të drogës.
