Ish-kryetari i Partisë Demokratike në Shkodër, Xhevdet Amuli, ka shprehur kritika të forta gjatë një takimi me ish-të përndjekur politikë, ku në fokus ishte çështja e mungesës së kompensimeve nga shteti për këtë shtresë.
Gjatë fjalës së tij, Amuli deklaroi se dy forcat e mëdha politike në vend, duke iu referuar Partisë Socialiste dhe Partisë Demokratike, sipas tij tashmë kanë të njëjtin orientim politik.
“Janë të dyja të majta”, është shprehur ai, duke evidentuar pakënaqësinë për atë që e konsideroi largim të Partisë Demokratike nga parimet mbi të cilat ishte ndërtuar dikur.
Ish-drejtuesi demokrat në Shkodër kritikoi veçanërisht mungesën e vëmendjes ndaj ish-të përndjekurve politikë dhe mosrealizimin e dëmshpërblimeve të premtuara ndër vite, ndërsa la të kuptohet se edhe forca politike që ai vetë drejtoi për vite me radhë ka kaluar, sipas tij, në politika me frymë socialiste.
