Kjo e diel shënoi një nga ditët më të ngarkuara të sezonit në plazhin e Velipojës, ku fluksi i pushuesve arriti në mijëra. Në këtë ambjent të mbushur me njerëz, dy raste të humbjes së fëmijëve u raportuan, por falë reagimit të shpejtë të Policisë Bashkiake, ata u lokalizuan shumë shpejt.
I pari rast kishte të bënte me një vajzë të vogël, e cila humbi në vetëm disa sekonda nga sytë e prindërve të saj. E humbur në mes të turmës, ajo u bllokua duke kërkuar rrugën për të rikthyer te familja e saj.
Pak më vonë, një djalë i vogël gjithashtu u raportua si i humbur në një pjesë tjetër të plazhit.
Pas njoftimit nga pushuesit, ekipi i Policisë Bashkiake i vendosur në Velipojë, nën udhëheqjen e shefit të stacionit Aleksandër Alia, nisi menjëherë kërkimet. Patrullat, duke përfshirë efektivët Aleksandër Kodra, Florian Bekteshi, Armando Pepaj dhe Said Legataj, u shpërndanë përgjatë vijës bregdetare për të gjetur fëmijët.
Për të mbështetur kërkimet, u bashkua edhe shefi i Policisë Bashkiake, Sajmir Rrustemi, që ndodhej jashtë orarit zyrtar të punës dhe me pushime. Ai ishte personi që bëri të mundur gjetjen e vajzës, të cilën më pas ia dorëzoi prindërve të saj. Ndërkohë, djaloshi u zbulua gjithashtu nga grupi i policisë që ishte angazhuar në terren.
Autoritetet e ftojnë të gjithë prindërit që të tregojnë kujdes të veçantë ndaj fëmijëve gjatë qëndrimit në plazh. Fluksi i madh i pushuesve bën që disa sekonda të pakujdesi të mjaftojnë për të humbur orientimin, duke shkaktuar shqetësim te familjarët dhe duke kërkuar angazhimin e strukturave të sigurisë.
