Banorët e Divjakës kanë vazhduar me këmbëngulje aksionin qytetar, duke organizuar këtë të hënë protestën e 53-të radhazi kundër ndryshimit të hartës territoriale që parashikon shkrirjen e bashkisë së tyre dhe bashkimin me Lushnjen.
Përballur me vendime të hartuara në nivelet drejtuese të pushtetit, qytetarët e Divjakës po japin shembull të qëndrueshmërisë në mbrojtje të pavarësisë dhe identitetit të komunitetit të tyre.
Sipas tyre, nisma e qeverisë synon të fshijë me një vendim të vetëm një histori 34-vjeçare të Divjakës si qytet, si dhe afro 12 vjet të funksionimit si bashki me administrim të pavarur.
Mbrëmjen e së hënës, pjesëmarrësit në protestë përmbyllën tubimin me një marshim përgjatë rrugëve kryesore të qytetit, duke dërguar një sinjal të qartë për institucionet.
Gjatë protestës, brohoritjet “Divjaka bashki!” dhe “Divjaka e qytetarëve, jo e pushtetarëve!” u dëgjuan fort, ndërsa demonstruesit ritheksuan vendosmërinë për të vazhduar pa ndërprerje derisa të përmbushen kërkesat e tyre ligjore dhe komunitare.
