Deputetja e Partisë Demokratike, Greta Bardeli, ka reaguar ashpër ndaj deklaratave për vendosjen e pagesës në rrugën Milot–Shkodër.
Përmes një reagimi publik, Bardeli akuzoi qeverinë për arrogancë dhe korrupsion, ndërsa paralajmëroi se shkodranët nuk do të pranojnë të paguajnë për një rrugë që, sipas saj, u takon si detyrim i shtetit.
Deputetja solli në vëmendje edhe protestat e mëparshme për “Rrugën e Kombit”, duke përmendur traun e Kukësit si simbol të revoltës qytetare.
“Karakaçi i ri e deklaroi që rruga Milot–Shkodër do të jetë me pagesë. Por nëse i paguan ky nga xhepi i vet, është në rregull; përndryshe, i kujtoj traun e Kukësit që e përpiu zjarri i revoltës së qytetarëve. Nuk do t’u merret kokërr leku shkodranëve për rrugë të re, se ua keni borxh”, shprehet Bardeli.
Në fund të reagimit të saj, deputetja përdori tone të forta ndaj qeverisë, duke i cilësuar drejtuesit si “gjakpirës të korruptuar të oborrit”.
