Ish-presidenti sirian Bashar al-Assad është dënuar me vdekje nga një gjykatë në Damask, pasi u shpall fajtor për vrasje të qëllimshme, torturë, ndalim arbitrar dhe krime kundër njerëzimit gjatë represionit ndaj kundërshtarëve të regjimit të tij.
Në të njëjtin proces është dënuar me vdekje edhe Atef Najib, ish-kreu i Sigurisë Politike në provincën Deraa dhe kushëri i Assadit, i cili u akuzua për vrasje, torturë dhe rol në shtypjen e dhunshme të protestave që shpërthyen në vitin 2011.
Gjykata e Katërt Penale në Damask e zhvilloi procesin ndaj Assadit në mungesë, pasi ish-presidenti sirian ndodhet jashtë vendit. Gjykata urdhëroi gjithashtu ndjekjen ndërkombëtare të Bashar al-Assadit dhe vëllait të tij, Maher al-Assad, i cili gjithashtu u dënua me vdekje në të njëjtin proces.
Sipas vendimit, Assad u konsiderua përgjegjës për një sërë krimesh të përshkruara nga gjykata si “serioze dhe të tmerrshme”, përfshirë vrasjen e shumë personave, torturën, ndalimet arbitrare dhe shënjestrimin e civilëve, përfshirë fëmijë.
Atef Najib, i cili u arrestua në Siri pas rënies së regjimit Assad, është figura kryesore e procesit të parë publik kundër një zyrtari të lartë të regjimit të mëparshëm. Ai ishte në krye të Sigurisë Politike në Deraa në kohën kur nisën protestat e vitit 2011 dhe akuzohet se luajti rol kyç në shtypjen e tyre.
