Veprat fotografike të Gjon Milit janë sjellë në një tjetër formë përmes punëtorisë krijuese “Cube It”, zhvilluar në Muzeun Kombëtar të Fotografisë “Marubi”.
Aktiviteti u ofroi të rinjve një mënyrë më interaktive për të njohur fotografinë, duke i shndërruar imazhet e Gjon Milit në pjesë të një pune krijuese me forma tredimensionale.
Pjesëmarrësit fillimisht u njohën me fotografitë origjinale të Milit dhe më pas përzgjodhën elemente e detaje prej tyre, të cilat i përdorën për të veshur kube dhe kuboide. Në këtë mënyrë, fotografitë u kthyen në pjesë të një “puzzle” të ndërtuar në hapësirë.
Sipas Jozefina Vokrrit, specialiste në Sektorin e Edukimit pranë Muzeut “Marubi”, qëllimi i punëtorisë është që të rinjtë të mos i shohin fotografitë vetëm si imazhe, por t’i eksplorojnë ato përmes një qasjeje tjetër, duke u ndalur te detajet dhe duke i rikrijuar në forma gjeometrike.
Përmes “Cube It”, fotografia e Gjon Milit u bë pikënisje për eksperimentim dhe bashkëpunim, duke ndërthurur trashëgiminë fotografike me një mënyrë bashkëkohore të të mësuarit dhe krijimit.
