Presidenti i Brazilit, Luiz Inacio Lula da Silva, shpalli të premten ndalimin e basteve online në shtetin më të madh të Amerikës së Jugut, ndërkohë që prezantoi edhe një program të ri për të lehtësuar shlyerjen e borxheve të familjeve.
Me anë të një dekreti ekzekutiv, Lula da Silva vendosi t’i japë fund operimit të kompanive të basteve online në Brazil, duke kthyer pas vendimin e qeverisë që prej afro dy vitesh kishte vendosur kornizën ligjore për funksionimin e kësaj industrie.
Ky dekret duhet të marrë miratimin e Kongresit brenda 120 ditëve për të vazhduar të jetë në fuqi, sipas mediave.
Sipas autoriteteve braziliane, shpenzimet në rritje për lojërat e fatit kanë rënduar financat e familjeve dhe kanë ndikuar në nivele rekord të borxheve familjare.
Sondazhet e fundit tregojnë se rreth 75% e qytetarëve të Brazilit mbështesin ndalimin total të basteve online.
“Përballemi me një problem të shëndetit publik të lidhur me bastet online. Është një problem serioz”, tha ministri i Financave, Dario Durigan.
Platformat e kompanive të basteve do të mbeten të hapura deri më 5 tetor, duke u dhënë mundësi përdoruesve të tërheqin fondet e tyre nga llogaritë ekzistuese.
Pas kësaj date, nga 6 tetori, operatorët e rrjeteve dhe platformat e aplikacioneve do të kenë detyrimin të bllokojnë qasjen në këto faqe.
Bastet online u legalizuan në Brazil për herë të parë në vitin 2018, gjatë presidencës së Michel Temer.
Lula da Silva, në 2023, nënshkroi një ligj që përcaktoi rregullat për këtë sektor, duke lejuar jo vetëm bastet sportive, por edhe lojërat në kazinotë online.
Nga janari i vitit 2025, operatorët e licencuar do të mund të ofrojnë shërbime në të gjithë vendin, për aq kohë sa plotësojnë kushtet rregullatore dhe paguajnë tarifën e koncesionit.
