Bashkimi Evropian ka njoftuar se do të prezantojë një tarifë të re përpunimi për dërgesat e vogla të porositura përmes internetit nga jashtë BE-së, me synim kufizimin e hyrjes masive të produkteve të lira në tregun evropian.
Kjo tarifë pritet të zbatohet duke filluar nga 1 nëntori, ndërsa mbledhja e saj do të realizohet nga autoritetet kombëtare të secilit shtet anëtar.
Vendimi pason një marrëveshje të arritur në mars midis Parlamentit Evropian dhe shteteve të BE-së, e cila aktualisht është në pritje të miratimit zyrtar.
Njoftimet zyrtare theksojnë se Komisioni Evropian do të caktojë nivelin e tarifës, ndërkohë që përgjegjësinë për pagesën do ta kenë vetë platformat online, jo blerësit individualë.
Gjigantët e tregtisë elektronike, përfshirë “Shein”, “Temu”, “AliExpress” dhe “Amazon”, janë ndër kompanitë e prekura nga kjo masë e re.
Vetëm gjatë vitit 2025, doganat e BE-së kanë trajtuar pako nga shitjet online me vlerë rreth 6 miliardë euro, ndërsa 90% e këtyre dërgesave kanë origjinën nga Kina.
Kjo është tarifa e dytë që prezantohet në një periudhë të shkurtër kohore. Që prej korrikut, për mallrat me çmim të ulët të importuara nga jashtë BE-së aplikohet tashmë një tarifë doganore fikse prej 3 eurosh për çdo grup produktesh, kosto që shpesh i kalon konsumatorit fundor.
Ndikimet e para të kësaj politike janë vërejtur në Francë, ku që nga korriku është shënuar një rënie deri në 40% të importeve të pakove të vogla.
