Institucioni i Avokatit të Popullit ka hapur një hetim administrativ mbi përdorimin e forcës nga Policia gjatë protestës së mbajtur sot në Tiranë.
Në deklaratën zyrtare, Avokati i Popullit sqaron se hetimi është nisur me iniciativë të institucionit, në përmbushje të detyrimeve ligjore, për të analizuar nëse ndërhyrja e Policisë ka qenë e justifikuar dhe në përpjesëtim të drejtë, ashtu siç kërkojnë nenet 2, 3 dhe 11 të Konventës Evropiane për të Drejtat e Njeriut.
Njëkohësisht, ekipet e monitorimit nga ky institucion po veprojnë në terren, duke ndjekur situatën në Bllokun e Sigurisë si dhe pranë komisariateve ku ndodhen personat e shoqëruar gjatë zhvillimit të protestës.
Institucioni njofton se është duke kontrolluar mënyrën e respektimit të të drejtave të personave të shoqëruar, përfshirë mundësinë e sigurimit të avokatit, informimin e të afërmve, si edhe të drejtën për kontroll mjekësor.
Avokati i Popullit, në fund të deklaratës, u bën apel qytetarëve që mendojnë se u janë cenuar të drejtat gjatë protestës të paraqesin ankesa individuale pranë institucionit, në mënyrë që ato të shqyrtohen sipas procedurave të parashikuara.
