Forcat e sigurisë në Kosta Rikë kanë vënë në pranga Alejandro Arias Monge, i njohur me nofkën “El Diablo”, një prej të kërkuarve më të rrezikshëm në vend dhe i akuzuar si udhëheqës i një bande të fuqishme që merret me trafikun ndërkombëtar të drogës.
Sipas mediave të huaja, arrestimi i tij u realizua në rajonin Sarapiquí, në verilindje të San José. Operacioni u shoqërua me një shkëmbim zjarri mes policisë dhe pjesëtarëve të grupit. Nga përplasja mbetën të plagosur disa efektivë të policisë, ndërsa u ndaluan edhe persona të tjerë të dyshuar për përfshirje në rrjetin kriminal.
Autoritetet theksojnë se “El Diablo” dyshohet se ishte në krye të një strukture të madhe kriminale që operonte në fushat e trafikut të drogës, pastrimit të parave dhe aktiviteteve të tjera të paligjshme. Ai kishte arritur të shmangte kapjen për vite me radhë, ndërkohë që Shtetet e Bashkuara kishin caktuar një shpërblim prej 500 mijë dollarësh për këdo që ofronte informacion që çonte në ndalimin e tij.
Me arrestimin e tij, pritet të nisin procedurat ligjore për ekstradimin e mundshëm të “El Diablo” drejt SHBA-së, ku ai përballet me akuza për trafik ndërkombëtar të narkotikëve.
