Ambasada e Shteteve të Bashkuara shpalli të enjten se protestat e rregullta vazhdojnë në kryeqytetin e Shqipërisë, para ndërtesës së Kryeministrisë, e cila ndodhet në Bulevardin “Dëshmorët e Kombit”, mes Sheshit Skënderbej dhe Sheshit Nënë Tereza.
Njoftimi thekson se këto tubime pritet të vazhdojnë edhe për ditët që vijnë, me mundësi që të shtrihen në qytete të tjera të Shqipërisë. Ambasada vë në dukje se, ndonëse protestat dhe grumbullimet e mëdha shpesh mund të nisin në mënyrë paqësore, situata ka potencialin për të ndryshuar papritmas.
Autoritetet kanë paralajmëruar se prania e forcave policore do të jetë e shtuar në zonat ku po zhvillohen protestat, duke përfshirë bllokimin e rrugëve dhe devijimin e trafikut, si dhe vështirësitë në lëvizje, sidomos në orët para dhe gjatë këtyre tubimeve. Është e mundur që protestat të përhapen edhe në zona të tjera, duke përfshirë institucione të tjera qeveritare.
Ambasada u bën thirrje qytetarëve amerikanë dhe publikut në përgjithësi që të shmangin demonstratat, të tregojnë kujdes ndaj ambientit përreth, të evitojnë shpërqendrimet si përdorimin e telefonave ose kufjeve në vende publike, dhe të ndjekin mediat lokale për informacione të përditësuara.
Gjithashtu, rekomandohet që qytetarët të kenë një plan emergjence ose një dalje të parashikuar dhe të ruajnë një profil të ulët kur lëvizin në zona ku mund të ndodhin grumbullime.
