Institucioni i posaçëm në Shënkoll, ku mbahen persona me masa mjekësore, po përballet me mbipopullim të rëndë. Gjatë një inspektimi të papritur, Avokati i Popullit konstatoi se në një strukturë me kapacitet për 280 persona ndodhen mbi 430 pacientë, ndërsa në disa dhoma qëndrojnë deri në 12 persona.
Sipas Avokatit të Popullit, kushtet janë të papranueshme dhe cenojnë të drejtat e pacientëve, duke theksuar se ky institucion duhet të funksionojë si një spital forensik dhe jo si burg. Gjithashtu u evidentua mungesa e stafit mjekësor dhe nevoja për ndërhyrje urgjente nga institucionet përgjegjëse.
Pas përfundimit të inspektimit, pritet të hartohet një raport me rekomandime për Ministrinë e Drejtësisë dhe Drejtorinë e Përgjithshme të Burgjeve.
