Protestat kundër qeverisë janë rikthyer në rrugët e Tiranës, me studentë të mbledhur përpara Ministrisë së Arsimit, ku kanë kërkuar dorëheqjen e kryeministrit Edi Rama.
Atmosfera u tensionua shpejt, duke sjellë përplasje mes demonstruesve dhe policisë. Disa pjesëmarrës i vunë zjarrin kazanëve të mbeturinave dhe hodhën gurë e bomba molotov drejt uniformave blu. Policia reagoi me përdorim të autobotëve të ujit dhe gazit lotsjellës, raportoi IlFattoQuotidiano, i cili ndoqi nga afër ngjarjet në kryeqytet.
Përplasjet zgjatën rreth 30 minuta, pas së cilës një pjesë e protestuesve u largua. Pavarësisht kësaj, turma vazhdoi marshimin drejt Kryeministrisë, edhe pse shiu vazhdonte të binte mbi qytetin.
Forcat e shumta të policisë mbetën të pozicionuara pranë Ministrisë së Arsimit gjatë të gjithë zhvillimit të protestës.
Sipas raportimeve, protestat kundër qeverisë në Shqipëri kanë qenë të pranishme prej disa muajsh dhe janë përshkallëzuar më tej që nga tetori.
Për të frenuar aktet e dhunës në demonstrata, qeveria ka ashpërsuar masat ndëshkuese, duke vendosur gjoba që mund të shkojnë deri në 5,500 euro për individët përgjegjës, sipas burimeve të raportuara.
Protestat e fundit kanë sjellë edhe dëmtime e djegie të ndërtesave publike, mes të cilave institucione, gjykata dhe biznese private.
Studentët vazhdojnë të ngulin këmbë për largimin e kryeministrit Edi Rama, ndërsa qeveria socialiste vazhdon të jetë në pushtet që nga viti 2013.
