Sheshi “Zahir Pajaziti” në Prishtinë është mbushur sot me protestues që kërkojnë drejtësi për vrasjen e Arlinda Zekajt dhe llogaridhënie nga institucionet.

Mes atyre që morën pjesë në tubim janë edhe anëtarët e familjes së Arlinda Zekajt.

Protesta u shoqërua me thirrje të tilla si: “Na nuk jemi vetë, e kena njana-tjetrën”, “Liri, barazi, solidaritet” dhe “Shteti i ka duart me gjak”. Ndër pankartat që u shfaqën në turmë, binte në sy edhe mesazhi: “Gjumi s’ka me iu marrë, flaka ka me iu dalë”.

Arlinda Zekaj humbi jetën të dielën në mbrëmje në Vitomiricë të Pejës. Personi i dyshuar për vrasjen, kunati i saj, u arrestua mbrëmë në orët e vona. Përveç tij, policia kishte ndaluar më herët edhe ish-bashkëshortin e Arlinda Zekajt.