Fitorja me përmbysje ndaj Besëlidhjes, me rezultatin 84-82, ka konfirmuar karakterin dhe forcën e Vllaznisë në basketbollin për meshkuj. Megjithatë, pavarësisht rezultateve pozitive dhe vendit të parë në renditje, trajneri Eni Llazani kërkon që skuadra të ruajë qetësinë dhe të mos bjerë pre e euforisë.
Tekniku shkodran vlerëson reagimin e lojtarëve të tij në një ndeshje të vështirë, ku besimi dhe këmbëngulja deri në fund bënë diferencën për sigurimin e fitores.
Edhe pse Vllaznia e ka nisur sezonin në mënyrën më të mirë, Llazani preferon të mos nxitohet në deklarata për objektivat madhorë, duke e vënë theksin te puna dhe vazhdimësia nga një ndeshje në tjetrën.
Prova e radhës për kuqeblutë do të jetë përballja me Teutën, një duel i drejtpërdrejtë mes dy skuadrave që kryesojnë kampionatin me pikë të barabarta. Në këtë sfidë, mbështetja e tifozëve pritet të jetë një faktor i rëndësishëm për ekipin shkodran.
Ndeshja Vllaznia–Teuta do të luhet të shtunën, më 31 tetor, në orën 19:00, në Pallatin e Sportit “Qazim Dervishi”, në kuadër të javës së katërt të kampionatit kombëtar të basketbollit për meshkuj.
