Çimentoja mbetet një nga produktet më të rëndësishme të industrisë në Shqipëri. Në vitin 2025, prodhimi i çimentos Portland arriti në afërsisht 1 milion e 993 mijë tonë, duke shënuar një rritje prej 2.5% krahasuar me 2024-n. Po ashtu, prodhimi i betonit të gatshëm shënoi një rritje prej 3.5%, duke kapur shifrën e 1.8 milionë tonëve.
Një zgjerim i ndjeshëm është vërejtur edhe në prodhimin e sistemeve të fijeve elektrike të izoluara për automjete. Gjatë vitit 2025, ky sektor prodhoi rreth 263 miliardë copë, një rritje prej 8.7%. Industria ushqimore ka vijuar gjithashtu me ritme në rritje, ku prodhimi i bukës së freskët arriti 67 mijë tonë, duke shënuar një rritje vjetore prej 8.4%.
Megjithatë, rënie të ndjeshme kanë regjistruar disa sektorë kryesorë. Vlera e shitjeve të naftës bruto pësoi një ulje prej 24.3%, ndërkohë që shitjet e xeherorëve dhe koncentrateve të kromit ranë me 23.9%.
Sa i përket rritjes së shitjeve, përparësi ka pasur llaçi i prodhuar në fabrikë, që u rrit me 19.5%, ndërkohë që alumini i lidhur i papërpunuar shënoi një rritje prej 15.4%.
Në përbërjen e shitjeve industriale, produktet ushqimore kryesojnë me 16.4% të totalit, të ndjekura nga produktet minerare me 14.4% dhe metalurgjia me 8.4%.
