Në ujërat pranë ishullit Gavdos, jug të Kretës, të paktën një person ka humbur jetën dhe 25 të tjerë janë ende të zhdukur pasi një varkë me emigrantë u mbyt.
Roja Bregdetare e Greqisë bëri të ditur se 51 persona janë shpëtuar nga deti.
Qendra e Përbashkët e Koordinimit të Kërkim-Shpëtimit (JRCC) mori nën drejtim operacionin pasi autoritetet morën sinjalizim për një mjet lundrues me emigrantë në vështirësi.
Anije patrulluese, një helikopter dhe një dron u përfshinë në operacionin për kërkimin dhe shpëtimin e emigrantëve, ndërkohë që ndihmë dhanë edhe anije tregtare në afërsi.
Agjencia e Bashkimit Evropian për mbrojtjen e kufijve, Frontex, ka dhënë gjithashtu asistencë në këtë ndërhyrje.
Raportohet se erërat e forta po e vështirësojnë në mënyrë të ndjeshme operacionin e kërkimit.
Kërkimet vijojnë, teksa autoritetet po kontrollojnë një zonë të gjerë detare me shpresën për të gjetur të mbijetuar apo gjurmë të personave të zhdukur.
