Punonjës të Drejtorisë Vendore të Policisë Shkodër dhe strukturave në varësi të saj kanë dhuruar gjak në kuadër të nismës “Dhuro gjak, shpëto jetë!”.
Nisma, e organizuar nga Qendra Kombëtare e Transfuzionit të Gjakut, synon të sigurojë mbështetje për pacientët që kanë nevojë të vazhdueshme për transfuzione, veçanërisht personat që jetojnë me talasemi.
Me këtë angazhim, efektivët e Policisë së Shkodrës kanë përcjellë një mesazh solidariteti dhe përgjegjësie sociale, duke e shtrirë kontributin e tyre përtej detyrës së përditshme në garantimin e rendit dhe sigurisë.
Dhurimi i gjakut mbetet një akt i thjeshtë, por me rëndësi të madhe për pacientët që varen nga transfuzionet e rregullta. Policia e Shkodrës shprehet se do të vijojë të mbështesë edhe në të ardhmen iniciativa me karakter humanitar.
