Në politikë, ndonjëherë nuk është e nevojshme të thuash asgjë. Mjafton një foto.
Në postimin e fundit të Edi Ramës bie në sy një detaj që, të paktën nga jashtë, është vështirë të mos të bëjë përshtypje: Elisa Spiropali shfaqet e bërë blur në fotografitë e takimit.
Ndoshta është rastësi. Ndoshta është thjesht mënyra si është përpunuar fotografia. Por, po të kemi parasysh se në politikën shqiptare edhe një karrige e lënë bosh mund të prodhojë teori, një Spiropali e bërë blur është pothuajse një komunikatë për shtyp.
Mesazhi ironik do të ishte: je ende në foto, por nuk je më në fokus.
Dhe kjo është ndoshta mënyra më elegante për t’i dhënë fund një karriere politike: nuk të heqin nga fotografia, thjesht të heqin nga qartësia.
Dikur Spiropali ishte ndër fytyrat më të dukshme të pushtetit të Ramës. Sot, nëse i besojmë këtij detaji fotografik, duket sikur ka kaluar në kategorinë e atyre që ekzistojnë fizikisht në kornizë, por politikisht po dalin nga kuadri.
Në PS dihet: sa kohë je në fokus, je dikush. Kur fillon të të kapë blur-i… ndoshta duhet të fillosh të mendosh për daljen.
Sepse Rama nuk ka nevojë të thotë: “Të braktisa.”
Mjafton të mos të bëjë më fokus.
