Qarkullimi i autobusëve të transportit urban në Shkodër vijon të shoqërohet me vështirësi të shumta, veçanërisht për shkak të automjeteve që parkojnë në hapësirat pranë stacioneve të përcaktuara për autobusët.
Në shumë pika të qytetit, autobusët e kanë të vështirë të afrohen dhe të ndalojnë normalisht për të marrë apo zbritur pasagjerët, pasi vendet që duhet të jenë të lira rezultojnë të zëna nga automjete private.
Problematika bëhet edhe më e dukshme gjatë ditëve me fluks të lartë lëvizjesh, kur trafiku në rrugët e Shkodrës është i rënduar dhe çdo pengesë shtesë ndikon drejtpërdrejt në qarkullimin e transportit publik.
Një tjetër shqetësim për drejtuesit e autobusëve janë parkimet në dy rreshta. Në disa prej akseve kryesore, automjetet e lëna në këtë mënyrë ngushtojnë ndjeshëm rrugën dhe detyrojnë autobusët të manovrojnë me vështirësi, duke krijuar vonesa dhe bllokime të përkohshme.
Pavarësisht kontrolleve dhe gjobave të vendosura herë pas here nga policia e shtetit dhe policia bashkiake, situata përsëritet. Ndërgjegjësimi i drejtuesve të mjeteve për respektimin e hapësirave të transportit publik mbetet ende i ulët.
Problemi lidhet edhe me mungesën e hapësirave të mjaftueshme për parkim në qytet. Numri i kufizuar i parkingjeve publike, i kombinuar me një transport urban që ende nuk i përgjigjet plotësisht nevojave të qytetarëve, bën që përdorimi i automjeteve private të mbetet shumë i lartë.
Në këto kushte, stacionet e autobusëve dhe hapësirat e tjera të destinuara për qarkullimin e transportit publik kthehen shpesh në pika parkimi, duke vështirësuar jo vetëm punën e shoferëve, por edhe lëvizjen e qytetarëve që përdorin autobusin.
