Policia ka vënë në pranga pasditen e sotme Ergys Agasin, një nga personat më të kërkuar nga autoritetet e drejtësisë.
Gazetarja Klodiana Lala raportoi se arrestimi i Agasit u krye në qytetin e Elbasanit.
Ndërkohë, mbeten ende të panjohura detajet rreth mënyrës se si u kap Agasi dhe pritet që informacionet të bëhen të ditura në orët në vijim.
Kush është Ergys Agasi?
Ergys Agasi është një figurë e njohur në opinionin publik, i përmendur shpesh në vitet e fundit si pjesë e debateve politike dhe raporteve investigative për krimin e organizuar dhe korrupsionin në nivele të larta.
Emri i tij është përfshirë vazhdimisht në akuzat e partive politike, të cilat e kanë portretizuar si një personazh me ndikim të madh në prapaskenat e politikës, në emërimet administrative dhe në lidhjet me strukturat e mazhorancës në pushtet.
SPAK ka nisur hetime për disa dosje të rëndësishme që lidhen me korrupsionin, pastrimin e parave dhe transferimin e produkteve të veprave penale. Në këtë kuadër, Agasi ishte shpallur zyrtarisht në kërkim, pasi më herët ishte subjekt i kontrolleve të banesës dhe sekuestrimeve të pasurive.
