Autonomia spitalore ka ndryshuar mënyrën e menaxhimit dhe përdorimit të kapaciteteve shëndetësore, por diferenca mes spitaleve universitare dhe atyre rajonale mbetet e ndjeshme.
Sipas një raporti monitorimi të organizatës “Together for Life”, gjatë vitit 2024, spitalet universitare shënuan një normë mesatare të shfrytëzimit të shtretërve prej 81.68%. Në spitalet rajonale, kjo shifër ishte vetëm 35.87%.
QSUT rezulton me përdorimin më të lartë të kapaciteteve, me një normë që varion nga 81% deri në 86.5%, çka lidhet edhe me kërkesën e lartë për shërbime të specializuara.
Në Spitalin Memorial të Fierit, përdorimi i shtretërve u rrit nga 61.8% në më shumë se 71%, ndërsa Spitali Rajonal i Vlorës raportoi një shfrytëzim rreth 40–42%.
Situata paraqitet më ndryshe në Shkodër dhe Lezhë. Në Spitalin Rajonal të Shkodrës, vetëm 30.22% e kapacitetit të shtretërve u shfrytëzua gjatë vitit 2024. Numri i pacientëve të shtruar ishte 12,855, që përfaqëson 55.9% të objektivit të përcaktuar për vitin.
Në Lezhë, shfrytëzimi i shtretërve ishte 33.7%, ndërsa numri i shtrimeve arriti në 5,475 pacientë.
Megjithatë, shifrat e ulëta të shfrytëzimit të shtretërve nuk shoqërohen me aktivitet të ulët në të gjitha shërbimet. Në Shkodër, janë kryer 8,974 ekzaminime me skaner, duke tejkaluar me 63.2% objektivin vjetor. Në Lezhë, ndërhyrjet kirurgjikale kanë qenë 31.4% mbi planin.
Një tjetër tregues i rëndësishëm është pesha e urgjencave në shtrimet spitalore. Në Lezhë, 80.6% e pacientëve të shtruar kanë ardhur përmes urgjencës, ndërsa në Shkodër kjo shifër ka qenë 71.4%.
Raporti evidenton kështu një situatë kontradiktore: spitalet rajonale përballojnë një numër të konsiderueshëm konsultash, analizash dhe ekzaminimesh, por një pjesë e kapaciteteve të tyre të shtrimit mbetet e papërdorur.
Sipas “Together for Life”, forcimi i shërbimeve spitalore rajonale dhe një shpërndarje më e mirë e pacientëve mund të ndihmojnë në uljen e ngarkesës së QSUT-së, ndërsa njëkohësisht do të mundësonin përdorimin më efikas të kapaciteteve që tashmë ekzistojnë jashtë Tiranës.
