Një aksident i rëndë ka ndodhur në zonën e njohur si Pushimi i Shoferit, përgjatë autostradës Lushnje-Fier. Në këtë ngjarje, një automjet Volkswagen është përplasur me një furgon që kishte në bord udhëtarë që udhëtonin drejt jugut të vendit.
Sipas informacioneve, drejtuesi i furgonit, në përpjekje për të evituar përplasjen me Volkswagen-in, ka devijuar mjetin dhe është goditur fort me barrierat metalike të autostradës. Si pasojë e këtij incidenti, disa prej pasagjerëve të furgonit kanë mbetur të lënduar. Megjithatë, vetëm dy persona janë dërguar me ambulancë në spital për të marrë trajtim mjekësor.
Forcat e policisë kanë shkuar në vendngjarje për të siguruar zbardhjen e plotë të rrethanave të aksidentit dhe për të rregulluar fluksin e trafikut në atë segment rrugor.
Pavarësisht se kryqëzimi në Pushimin e Shoferit është i njohur si një pikë problematike për sigurinë rrugore dhe është shkaktare e aksidenteve të shumta, deri më sot Autoriteti Rrugor Shqiptar nuk ka ndërmarrë asnjë masë për rregullimin apo përmirësimin e tij.
