Në ditët kur temperaturat i kalojnë 40 gradë, mungesa e ujit të pijshëm vijon të jetë një problem i përditshëm për banorët e Malësisë së Madhe.
Në Bajzë, Zef Gropçaj tregon se për të siguruar ujë për nevojat e familjes duhet të shkojë në qendër të fshatit, te një çezmë publike.
“24 orë jemi ne, jo uji. Sot për herë të parë ka ardhur mirë, nja dy orë”, shprehet ai.
Problemi nuk është i izoluar vetëm në Bajzë. Të njëjtën situatë raportojnë edhe banorë të zonave përreth, ndërsa furnizimi i kufizuar me ujë është kthyer në shqetësim edhe për qytetin e Koplikut.
Mungesa bëhet edhe më shqetësuese gjatë këtyre ditëve me temperatura ekstreme, kur nevoja për ujë është shumë më e madhe.
Ironikisht, në dekadën e fundit në Malësinë e Madhe janë investuar miliona euro në rrjetet e ujësjellësit në Gruemirë, Koplik dhe Bajzë. Megjithatë, pavarësisht investimeve, shumë familje vijojnë të thonë se uji nuk mbërrin rregullisht në çezmat e shtëpive të tyre.
