Studiuesi dhe historiani Romeo Gurakuqi ka reaguar ashpër pas vendimit për lejimin e vijimit të punimeve në kullën që po ndërtohet në qendër të Shkodrës.
Në reagimin e tij, Gurakuqi ngre pretendime lidhur me vendndodhjen e objektit, duke argumentuar se ndërtimi prek gjurmët e një kanali historik të ujërave të bardha, të cilin ai e konsideron pronë publike dhe të mbrojtur ligjërisht.
Ai kritikon gjithashtu institucionet për lejimin e punimeve gjatë sezonit turistik, duke iu referuar kufizimeve të vendosura për kantieret e ndërtimit. Sipas tij, prania e vinçit dhe mjeteve të rënda në një zonë të frekuentuar të qytetit përbën edhe shqetësim për sigurinë e qytetarëve.
Gurakuqi e drejton reagimin e tij ndaj IKMT-së, duke pretenduar se mosveprimi institucional mund të përbëjë “shpërdorim detyre” dhe se përgjegjësitë, sipas tij, janë të dokumentuara.
“Jeni në shpërdorim detyre”, shprehet ai, duke shtuar se, sipas pretendimeve të tij, ndërtimi është kryer mbi një kanal rreth 170-vjeçar të ujërave të bardha të qytetit. Ai ngre gjithashtu pretendime për ndërhyrje në zonën ku, sipas tij, ndodheshin varrezat e të rënëve të vitit 1913.
Historiani akuzon institucionet për heshtje dhe mosreagim ndaj situatës, ndërsa paralajmëron se përgjegjësia ligjore për veprimet apo mosveprimet e tyre, sipas tij, nuk mund të shmanget.
Reagimi i Gurakuqit vjen në një kohë kur vijimi i punimeve në kullën në qendër të Shkodrës ka ngjallur debat publik lidhur me respektimin e rregullave të ndërtimit, mbrojtjen e trashëgimisë dhe sigurinë në zonën përreth.
Burimi: Veriu Sot
