Dy projekte të rëndësishme të paraqitura nga Bashkia Vau-Dejës në kuadër të “Paketës së Maleve” kanë kaluar me miratimin e KKTU-së, duke shënuar hapat e parë drejt konkretizimit të investimeve të reja në zonë.
Lajmi është bërë publik nga kryetari i Bashkisë Vau-Dejës, Kristian Shkreli, i cili ka bërë të ditur se bëhet fjalë për ndërtimin e një resorti agroturistik dhe një fabrike për përpunimin e ullirit.
Sipas kryebashkiakut, këto investime synojnë të krijojnë më shumë mundësi për zhvillimin ekonomik të zonës, të nxisin turizmin dhe të rrisin vlerën e prodhimeve vendase.
Shkreli ka deklaruar gjithashtu se edhe projektet e tjera të aplikimit në kuadër të “Paketës së Maleve” pritet të marrin miratimin në vijim, me synimin për të sjellë investime të reja dhe hapësira zhvillimi për komunitetin dhe sipërmarrjen lokale.
Dy projektet e miratuara konsiderohen si hapi i parë i konkretizimit të kësaj pakete në Vau-Dejës, ndërsa pritshmëritë janë që investimet e tjera të pasojnë në muajt në vijim.
