Hetimet për zbardhjen e plotë të rrethanave të zjarrit që përfshiu Parkun Kombëtar të Lurës po vijojnë, me qëllim identifikimin dhe ndëshkimin penal të personave përgjegjës për menaxhimin dhe mbrojtjen e territorit.
Tashmë, ndaj tre personave është nisur procedimi penal në gjendje të lirë për veprën “Shpërdorimi i detyrës”.
Në listën e të proceduarve përfshihen K. S., 35 vjeç dhe S. L., 51 vjeç, të dy banues në Dibër, si dhe A. L., 64 vjeç, nga Tirana. Dy nga këta persona kanë ushtruar funksionin e rojeve të mjedisit, ndërsa tjetri mbante përgjegjësi për monitorimin e parkut kombëtar.
Gjetjet e deritanishme të hetimeve tregojnë se këta individë dyshohen se nuk kanë ndërmarrë masat e domosdoshme për ruajtjen, mbikëqyrjen dhe mbrojtjen ndaj zjarrit të sipërfaqeve që u ishin besuar. Si rezultat i flakëve, janë dëmtuar dhe djegur disa hektarë sipërfaqe pyjore.
Policia vijon intensivisht punën për të identifikuar autorët e zjarrvënies dhe për t’i vënë ata përpara drejtësisë penale.
Materialet hetimore i janë përcjellë Prokurorisë së Dibrës për vijimin e procedurave të mëtejshme.
