Një trafikant droge, në banesën e të cilit policia zbuloi një sasi të konsiderueshme lëndësh narkotike në Cambridge, është urdhëruar nga gjykata të kthejë fitimet e përfituara nga aktiviteti kriminal.
Kastriot Ponari, 46 vjeç, po largohej nga ish-banesa e tij në Queen Edith’s Way në gusht të vitit 2022, kur oficerët e policisë mbërritën për të kryer një kontroll.
Gjatë kontrollit në banesë u gjetën telefona celularë, 1,785 paund në para cash, ndërsa garazhi ishte përshtatur si zonë për përgatitjen e lëndëve narkotike.
Policia sekuestroi gjithashtu kanabis me vlerë nga 3,000 deri në 5,000 paund, pako kokaine me vlerë rreth 15,000 paund, 169 tableta MDMA me vlerë 1,400 paund, si dhe rreth 750 gram kokainë me vlerë nga 19,000 deri në 32,000 paund.
Ponari u dënua me shtatë vite burg pasi pranoi fajësinë për ofrim për furnizim me MDMA, përfshirje në furnizimin me kokainë, kanabis dhe MDMA.
Pas dënimit, Njësia për Hetimin e Pasurive me Origjinë Kriminale (POCU) pranë Eastern Region Special Operations Unit (ERSOU) zhvilloi një hetim financiar, i cili zbuloi se ai kishte përfituar gjithsej 724,938.89 paund nga veprimtaria kriminale.
Në një seancë të zhvilluar në Gjykatën Crown të Peterborough, gjykata urdhëroi Ponarin të shlyejë pasuritë që zotëron aktualisht, me vlerë 128,881.40 paund.
Ai duhet ta paguajë këtë shumë brenda tre muajve, në të kundërt do të përballet me një vit shtesë burg, ndërsa detyrimi për të kthyer paratë do të mbetet në fuqi.
Menaxheri i Lartë i Hetimeve Financiare në POCU, Paul Fitzsimmons, deklaroi se qëllimi i këtyre hetimeve është që autorëve të veprave penale t’u hiqen fitimet e përfituara nga aktiviteti kriminal, duke goditur kështu bazën financiare të trafikut të drogës.
