Një tërmet i fuqishëm goditi provincën bregdetare të Paqësorit, Choco, në Kolumbi, në orët e para të së hënës, duke shkaktuar të plagosur dhe dëme të mëdha materiale, konfirmoi guvernatorja e kësaj province në platformën X. Lëkundjet u ndjenë jo vetëm në kryeqytetin kolumbian Bogotá, por edhe deri në Venezuelë.
Guvernatorja Nubia Carolina Cordoba-Curi shkroi në X: “Pikërisht tani kemi përjetuar një tërmet të madh në departamentin e Choco. Jemi të shqetësuar për pasgoditjet. Megjithëse epiqendra ishte pranë San Jose del Palmar, ka të plagosur dhe dëme të konsiderueshme në ndërtesa në kryeqytetin e departamentit, Quibdo. Tashmë kemi nisur vlerësimin e dëmeve dhe së shpejti do të publikojmë raportin e parë zyrtar.”
Sipas Njësisë Kombëtare për Menaxhimin e Rrezikut nga Fatkeqësitë (UNGRD), tërmeti u regjistrua në orën 07:34 të mëngjesit me një magnitudë prej 6.6 dhe me thellësi 79 kilometra.
