Pas kërcënimit të shoqatave të transportit publik për të ulur numrin e mjeteve në shërbim nëse nuk trajtohet kërkesa për kompensim për shkak të rritjes së çmimit të karburantit, Administrata Tatimore ka publikuar një deklaratë zyrtare.
Administrata njofton se më 1 gusht 2026 është mbyllur procesi i aplikimeve për skemën e kompensimit të dedikuar transportit publik.
Aktualisht, Administrata Tatimore është në fazën e zbatimit të procedurave të kompensimit për 95 subjekte, të cilat kanë aplikuar për ndihmë financiare për përballimin e kostove të shtuar nga çmimi i karburantit.
Sipas të dhënave zyrtare, totali i fondeve të destinuara për kompensimin e shoqërive të transportit qytetës, rrethqytetës dhe ndërqytetës është 110.7 milionë lekë.
Administrata Tatimore thekson se kjo shumë nuk përfshin shoqëritë që ofrojnë shërbim në linjat urbane të Tiranës. Për këto, kompensimi mbulohet nga Bashkia e Tiranës.
Për linjat urbane të kryeqytetit, kanë paraqitur aplikim në Administratën Tatimore 20 subjekte, të cilat kërkojnë një kompensim me vlerë totale prej 66.1 milionë lekësh.
“Vlera totale e kompensimit për shoqëritë e transportit qytetës, rrethqytetës dhe ndërqytetës arrin në 110.7 milionë lekë. Shifrat nuk përfshijnë kompensimin për shoqëritë e linjave qytetëse të Tiranës, i cili mbulohet nga Bashkia Tiranë. Numri i subjekteve që kanë aplikuar për t’u kompensuar nga Bashkia e Tiranës pranë Administratës Tatimore është 20 për një vlerë prej 66.1 milion lekë”, thuhet në njoftim.
Ky reagim nga Administrata Tatimore pasohet nga paralajmërimet e fundit të shoqatave të transportit, të cilat kanë shprehur shqetësimin për përballimin e kostove në rritje dhe kanë njoftuar mundësinë e zvogëlimit të flotës urbane, në mungesë të një përgjigjeje të qartë nga qeveria për mbulimin e diferencës së çmimit të karburantit.
