Kaos i madh është raportuar në jug të Kroacisë, përgjatë rrugës që të çon drejt kufirit me Malin e Zi, ku mijëra udhëtarë janë mbërthyer në kolona të gjata kilometrike. Vija e automjeteve në Çilip ka tejkaluar 20 kilometra, ndërsa pritja në pikat kufitare Debeli Brijeg dhe Konfin është zgjatur deri në 10 orë.
Në këto kushte të trafikut të rënduar dhe temperaturave të larta, banorët e Konavles kanë reaguar duke hapur shtëpitë dhe u kanë ofruar udhëtarëve ujë të pijshëm si dhe mundësinë për të përdorur tualetet. Ka pasur raportime edhe për raste kur qytetarët janë detyruar të qëndrojnë në pritje deri në 28 orë.
Shkak për këtë bllokim është bërë rritja e jashtëzakonshme e fluksit të automjeteve që udhëtojnë drejt Malit të Zi, kontrollet e shumta kufitare dhe kapacitetet e kufizuara të kalimit. Si rezultat, janë paralizuar edhe rrugët lokale, duke u krijuar vështirësi banorëve vendas.
Kryetari i Komunës së Konavles, Bozho Lasiç, e ka përshkruar situatën si të padurueshme dhe u ka kërkuar institucioneve ndërhyrje të menjëhershme. Në përgjigje, autoritetet kanë marrë masa të menjëhershme, duke siguruar furnizim me ujë të pijshëm dhe duke angazhuar shërbimet e emergjencës në zonë, me qëllim lehtësimin e udhëtarëve deri në zgjidhjen e krizës.
