Ditët e para të muajit gusht kanë sjellë stresin e trafikut rrugor në hyrje të Shkodrës.
Në këtë të diel, i gjithë aksi nga rrethrrotulli tek xhamia e Medresesë deri pas urës së Bunës, në një gjatësi prej afro 2 km, automjetet janë në radhë të gjata për të dalë nga qyteti i Shkodrës në drejtim të Tiranës.
Deri në orët e pasdites, ky aks qëndron me një trafik të dendur. Kjo situatë ka nisur që nga ditët e fundit të korrikut dhe do të vijojë përgjatë gjithë muajit gusht.
Punimet në hyrje të Shkodrës nuk kanë përfunduar ende për ndërtimin e urës së re të Bahçallekut. Një investim ky që ende nuk ka siguri nëse do të eleminojë këtë trafik kaq të dendur në një gjatësi prej afro 2 km.
E vetmja mundësi për të shmangur pritjet e gjata në hyrjen e Shkodrës është udhëtimi në orët e para të mëngjesit ose pasdite vonë kur kjo rrugë lirohet nga automjetet.
Rikthimi i shqiptarëve që jetojnë jashtë Shqipërisë kryesisht krijon këtë trafik por një ndikim kanë edhe shqiptarët e Kosovës dhe turistët e huaj duke bërë që ai aks rrugor të mos e përballojë gjithë atë fluks automjetesh.
