Plazhi i Shëngjinit po fiton gjithnjë e më shumë interes nga vizitorët e huaj këtë verë, duke u spikatur për pastërtinë, çmimet e aksesueshme, komoditetin dhe përshtatshmërinë për familjet me fëmijë—elemente këto që vlerësohen veçanërisht nga pushuesit.
Për shumë prej tyre, kjo bregdetare është kthyer në një zgjedhje të suksesshme, jo vetëm si vend ku mund të shijojnë pushime të qeta pranë detit, por edhe si një adresë që duan t’ua sugjerojnë miqve dhe të afërmve. Pushuesit shprehen se kanë përjetuar një atmosferë të qetë dhe mikpritëse, ku standardet e shërbimit shoqërohen me çmime të arsyeshme.
Një pjesë e turistëve kanë ndarë përshtypje pozitive për eksperiencën e tyre, duke përmendur se kjo është arsyeja kryesore që planifikojnë të rikthehen në të ardhmen.
Këtë sezon veror është vënë re një shtim i madh i të huajve që zgjedhin Shëngjinin për pushimet e tyre. Përveç fluksit nga vendet e Europës Lindore, në plazh janë të pranishëm edhe vizitorë nga Europa Perëndimore, disa prej të cilëve zgjedhin të rikthehen, duke e kthyer kështu zonën në një ndër destinacionet më të preferuara të sezonit.
