Pak më shumë se një muaj pasi makineritë e rënda të KESH ndërhynë në lumin e Currajve në Nikaj-Mërtur, duke devijuar rrjedhën natyrore të tij, natyra duket se ka “kthyer” gjithçka në vend.
Fadromat e KESH, të cilat u përdorën për të ngritur prita mbrojtëse sipas justifikimit të kompanisë, u përballën me kundërshtimin e banorëve lokalë. Këta të fundit protestuan, duke e cilësuar ndryshimin e shtratit të lumit si të dëmshëm për rrjedhën natyrore dhe ekosistemin e zonës.
Pas rreshjeve të fundit, prurjet e shtuara të ujit kanë bërë që lumi i Currajve të rifitojë rrjedhën e tij të mëhershme, ashtu siç është formuar gjatë viteve nga vetë forcat natyrore.
Pamjet e fundit tregojnë se uji është kthyer në shtratin origjinal, duke sfiduar dhe neutralizuar ndërhyrjen e bërë më parë nga KESH.
Banorët, të cilët u angazhuan në protesta kundër kësaj ndërhyrjeje, tani e shohin këtë zhvillim si një provë të qartë se ekuilibri natyror i lumenjve është i vështirë për t’u ndryshuar dhe theksojnë se çdo veprim në natyrë duhet të kryhet duke respektuar mjedisin dhe veçoritë lokale.
Burimi: Portali Veriu Sot
