Një zjarr i madh ka përfshirë pasditen e së dielës Pyllin e Sodës në Vlorë, duke prodhuar një sasi të madhe tymi të zi që është shpërndarë mbi një pjesë të konsiderueshme të qytetit.
Raportimet tregojnë se flakët u përhapën në zonën me pisha pranë linjës hekurudhore në Zvërnec. Menjëherë, në vendngjarje mbërritën ekipet zjarrfikëse si dhe Policia, të cilat po punojnë për të vendosur nën kontroll vatrën kryesore të zjarrit.
Shërbimet zjarrfikëse theksojnë se situata paraqitet e ndërlikuar, pasi njëkohësisht janë ndezur edhe disa vatra të tjera në territorin e Vlorës, përfshirë zonën e Dukatit, pranë tunelit të Llogarasë, në Parkun e Mallrave dhe në Triport.
Shkaqet e shpërthimit të zjarrit në Pyllin e Sodës mbeten ende të paqarta, ndërkohë që ndërhyrja për shuarjen e flakëve vazhdon pa ndërprerje.
