Kryetari i Partisë Demokratike në Shkodër, Ardit Çylybyli, ka komentuar zhvillimet politike në vend, duke theksuar se qeveria duhet të fokusohet te problemet reale me të cilat përballen qytetarët.
Sipas tij, sfidat kryesore mbeten rritja e kostos së jetesës, largimi i të rinjve nga vendi, korrupsioni, mungesa e besimit te institucionet dhe vështirësitë ekonomike që prekin shumë familje shqiptare.
Çylybyli shprehet se, ndërsa kryeministri Edi Rama është i angazhuar në debate dhe polemika, qytetarët vijojnë të përballen me probleme që kërkojnë zgjidhje konkrete.
Ai thekson se, kur një qeveri nuk arrin t’u përgjigjet pritshmërive të qytetarëve, alternativa demokratike është rikthimi te vota. Për këtë arsye, sipas tij, vendi ka nevojë për zgjedhje të parakohshme dhe krijimin e një qeverie teknike që do të garantonte një proces zgjedhor të besueshëm dhe të pranueshëm nga të gjitha palët.
“Nuk ka pushtet të përhershëm. Kur humbet besimi i qytetarëve, vendimi duhet t’u takojë sërish atyre përmes votës,” shprehet Çylybyli, duke shtuar se Shqipëria meriton një standard më të lartë qeverisjeje.
