Një nga drejtuesit e lartë të Forumit Shqiptar, njëkohësisht anëtar i Bordit Drejtues të Ndërmarrjes Publike për Menaxhimin e Të Mirave Detare të Malit të Zi, Ilir Draga, është ndaluar nga policia në Ulqin pas një aksioni të shërbimeve të sigurisë.
Policia e Malit të Zi njoftoi se forcat e sigurisë në Ulqin kanë ndërmarrë një operacion për të ndaluar keqpërdorimin e armëve të zjarrit, municioneve dhe materialeve shpërthyese. Gjatë këtij aksioni, u kontrollua banesa dhe ambientet ndihmëse të shtetasit I.D., 59 vjeç, në zonën e Sukobinit në Komunën e Ulqinit.
Gjatë bastisjes, autoritetet sekuestruan një pistoletë “Zastava M57”, 102 fishekë si dhe një pistoletë sinjalizuese të markës “Zoraki”.
Policia raportoi se gjatë procesit të kontrollit, I.D. ka penguar zyrtarët në ushtrimin e detyrës së tyre. Për pasojë, ai është shoqëruar në ambientet e Departamentit të Sigurisë në Ulqin, ku është marrë në pyetje dhe është hartuar një procesverbal mbi ngjarjen.
Lidhur me incidentin është informuar Prokuroria Themelore e Shtetit në Ulqin. Kjo e fundit ka konstatuar se nuk ekzistojnë elementë për ndjekje penale.
Megjithatë, ndaj I.D. është vendosur masa e arrestimit për kundërvajtje, konkretisht për pengimin e personit zyrtar gjatë kryerjes së detyrës, bazuar në Ligjin për Rendin dhe Qetësinë Publike. Po ashtu, janë ndërmarrë masa në përputhje me Ligjin për Armët, pasi pistoleta sinjalizuese është mbajtur në kundërshtim me dispozitat ligjore në fuqi.
Policia ka deklaruar se për armën e zjarrit dhe municionet e sekuestruara do t’i kërkojë njësisë administrative përkatëse që të rishqyrtojë lejen e armës, si dhe të nisë procedurat për konfiskimin e përhershëm të saj.
