Çiklisti i Vllaznisë Kristel Sota ka bërë një paraqitje të mirë në garat e kampionatit kombëtar të mountain bike të zhvilluara së fundi nga Federata Shqiptare e Çiklizmit. Ai ka rivalizuar fort deri në fund dhe si rrjedhojë është renditur në vendin e dytë duke u shpallur nënkampion i Shqipërisë.
Sota është një çiklist me shumë përvojë dhe në çdo garë ku ai merr pjesë, arrin të tregojë vlerat e tij. Këtë herë konkurrencën e ka patur me çiklistin e Tiranës Olsion Veliaj i cili është treguar pak më i shpejtë dhe si rrjedhojë ka zënë vendin e parë.
Megjithatë edhe vendi i dytë përbën sukses për çiklistin e Vllaznisë. Trajneri Leonat Kola e ka vlerësuar së tepërmi paraqitjen e Sotës në këto gara dhe padyshim që ka folur me superlativa për prezantimin e bërë prej tij.
Burimi: Gazeta “SHKODRA SPORT”
